Serenissime Princeps; Frater Et Amice Charissime, Ex Ijs Que Nobiscum Egit S. V. Illustris Legatus, Intelleximus, Quam Grate Vobis Faceremus Satis, Si Legatum Aliquem Cum Mandatis Instructum, Ad S. V. Ablegaremus.

In quo certe quidem instituto adeo nobis ex animo placuit, quod est honeste postulatum, vt non nisi praestita re, possemus nobis quoquo modo satisfacere.

Atque cum id haberemus apud nos decretum, nobis non incommode incurrit in mentem et oculos Hieronimus Bowes miles, ex nobilibus nostris Domesticis, plurimum nobis dilectus, quem, inpraesentiarum ad S. V. ablegamus, cuius prudentiae et fidei, totum hoc quicquid est, quod ad Serenitatum mutuo nostrarum dignitatem omandam pertinere posse arbitramur, commisimus. In quo munere perfungendo, quin omnem curam et diligentiam sit collaturus, neutiquam dubitamus: a S. autem V. rogamus, velit ei eam fidem habere in ijs persequendis quae habet a nobis in mandatis, quam nobis habendam putaret, si essemus praesentes. Praeterea, cum nobis multum charus sit Robertus Iacobus medicus, quem superiori [Marginal note: 1582.] anno, ad S. V. misimus, rogamus vt eum eo loco S. V. habeat, quo virum probatissimum, et singulari quam plurimarum virtutum laude ornatum habendum esse, boni principes censent. Quem a nobis neutiquam ablegauissemus, nisi amicitiae nostrae, et studio gratificandi S. V. plurimum tribuissemus. In qua dum voluntate manemus erga S. V. non nisi optime de bonis vestris meritis in praefatum Iacobum nobis pollicemur. Et Deum Opt. Max. precamur, vt S. V. saluam conseruet, et incolumem. Datae e Regia nostra Grenouici 19 die mensis Iunij, Anno Domini 1583, regni vero nostri vicessimo quinto.

Enter page number Go  Previous Next
Page 273 of 490
Words from 75400 to 75649 of 136233