"Si se partist de Venisse et chevaucha aux parties d'occident. Et
demoura mainz jours es contrees de Provence et de France et puys
fist passaige aux Ysles de la tremontaingne et s'en retourna par la
Magne, si comme vous orrez cy-apres. Et fist-il escripre son voiage
atout les devisements les contrees; mes de la France n'y parloit mie
grantment pour ce que maintes genz la scevent apertement. Et pour ce en
lairons atant, et commencerons d'autres choses, assavoir, de BRETAINGNE
LA GRANT."
Cy devyse dou roiaume de Bretaingne la grant.
"Et sachies que quand l'en se part de Cales, et l'en nage XX ou XXX
milles a trop grant mesaise, si treuve l'en une grandisme Ysle qui
s'apelle Bretaingne la Grant. Elle est a une grant royne et n'en fait
treuage a nulluy. Et ensevelissent lor mors, et ont monnoye de chartres
et d'or et d'argent, et ardent pierres noyres, et vivent de marchandises
et d'ars, et ont toutes choses de vivre en grant habondance mais non pas
a bon marchie. Et c'est une Ysle de trop grant richesce, et li marinier
de celle partie dient que c'est li plus riches royaumes qui soit ou
monde, et qu'il y a li mieudre marinier dou monde et li mieudre coursier
et li mieudre chevalier (ains ne chevauchent mais lonc com Francois).
Ausi ont-il trop bons homes d'armes et vaillans durement (bien que maint
n'y ait), et les dames et damoseles bonnes et loialles, et belles com
lys souef florant.
